Чакан машыгуу залында каскадёрлукка бел байлаган жигиттердин эң кичүүсү 15 жашта болсо, улуусу 30га барып калган. Аларды кесипкөй каскадёр Эрлан Жанышбеков машыктырат. Азырынча үч клип, бир тасмага тартылган жаштар ата мекендик жана чет элдик киночулар менен иштешүүнү пландап, күн сайын залда машыгууда.
Алардын бири Сооронбай Жумабай уулунун айтымында, машыккандар залга окуудан, жумуштан келип машыгат.
"Интернеттен биздин трюктарды көрүп башка балдар да келип жатат. Азыр жалпы 20дай адам машыгуудабыз. Анын жарымы каскадёрлук менен алектенишүүдө. Көпчүлүгү окуудан, жумуштан кийин келет. Кыска убакыт ичинде жыйынтыктар жакшы, үч клип, бир тасмага тартылдык. Анткени биз жасаган трюктардын бардыгын актёрлор аткара бербейт. Камеранын алдында мушташып, паркур (имарат, бөлмө, көчөлөрдү аралап катуу чуркап качуу — ред.) жасайбыз. Андан сырткары, атка минип, ат үстүндө кылыч менен чабышып, аттан кулап, автоунаага сүзүлгөн эпизоддорду аткара алабыз", — деди спортчу.
Күн сайын тер төгө машыккан шамдагай, чыйрак жигиттер Голливудга чейин жетүүнү максат кылышууда.
Тема боюнча: