БИШКЕК, 26-фев. — Sputnik. Ош шаарында текшерилбеген гемодиализ аппараттары менен бейтаптарды дарылап келген менчик клиника аныкталды. Бул тууралуу Башкы прокуратуранын маалымат кызматы кабарлады.
Билдирмеге караганда, Ош шаардык прокуратурасы саламаттык сактоо кызматкерлери менен бирге гемодиализ борборлорунда текшерүү жүргүзгөн. Анда бейтаптардын өмүрүнө жана ден соолугуна коркунуч келтирген "Жасалма бөйрөк" аппараттарын уруксаты жок иштетип жүргөн фактылар аныкталган.
"Т.М." аттуу менчик гемодиализ борбору 28 аппарат менен бейтаптарды дарылап келген. Бирок бир дагы жабдуусу Саламаттык сактоо министрлигинин тийиштүү департаментинен каттоодон өткөн эмес. Алар белгиленген убактысынан көп иштетилген. Бул иш боюнча Ош аймактык милдеттүү медициналык камсыздандыруу фондунун башчысы М.О. менен Саламаттык сактоо министрлигинин түштүк аймагы боюнча дары-дармектерди көзөмөлдөө департаментинин башчысы С.К. иштен бошотулду", — деп айтылат маалыматта.
Ал эми менчик гемодиализ борборунун жетекчилерине карата Кылмыш-жаза кодексинин 348 ("Шалаакылык") жана 146-беренеси ("Медициналык кызматкер тарабынан кесиптик милдеттерди талапка ылайыксыз аткаруу") боюнча кылмыш иши козголгону айтылды. Учурда тергөө уланууда.