БИШКЕК, 26-фев.— Sputnik. АКШ президенти Жо Байден НАТО боюнча Вашингтондун союздаштарын колдоо үчүн Европага АКШнын кошумча күчтөрүн жайгаштыруу боюнча буйрук чыгарганын билдирди. Бул тууралуу РИА Новости жазды.
"Кечээ айтканымдай, АКШ НАТОнун аймагын коргойт. Европада потенциалыбызды жогорулатуу максатында кошумча күчтөрдү жайгаштыруу боюнча буйрук чыгардым. Бул НАТО боюнча союздаштарды колдоого багытталган документ", — деди Байден.
Ал Россия президенти Владимир Путинди "эл аралык тынчтык жана коопсуздукка коркунуч жаратып жатат" деп күнөөлөп, НАТО эркиндик жана демократия тарапта экенин көрсөтүп жатканын белгилеген.
"Президент Путин Батышты бөлүп-жаруу боюнча максатына жетүүдө утулуп калды. НАТО болуп көрбөгөндөй чечкиндүү жана биримдикте. Ал эми альянс биздин баалуулуктарды бөлүшкөн жана качандыр бир кезде ага кошулууну чечкен Европа мамлекеттерине эшигин ачып турат", — деген АКШ президенти.
Буга чейин АКШ президенти Жо Байдендин администрациясы Европада турган америкалык аскерлерди Чыгыш Европага көбүрөөк жайгаштыруу мүмкүнчүлүгүн караштырып жатканы айтылган.
25-февралда НАТО Россияны тез арада Украинадагы атайын операцияны токтотууга чакырып, чукул жыйын өткөргөн.
Мындан тышкары, альянска мүчө-мамлекеттердин лидерлери Европадагы аскер күчүнүн жайгашуусун Украинадагы операциядан кийин кайра карап чыгарын айтышкан.