Россияга иштөө максатында келген чет элдиктер, анын ичинде ЕАЭБ өлкөлөрүнүн жарандары ушул жылдан тарта күчүнө кирген эки федералдык мыйзамдын талаптарын 30 күндүн ичинде аткаруусу зарыл. Ал эми эмгек миграциясынан башка багыт боюнча келгендер үчүн мөөнөт 90 күндү түзөт. Бул тууралуу Алмаз Букалаев Sputnik Кыргызстан радиосундагы маегинде билдирди.
Анын айтымында, иштөө максатынан башка багыттар боюнча келгендер медициналык күбөлөндүрүүдөн шаар ичиндеги медициналык мекемелерден өтө алышат.
"Өткөн жылдын 29-декабрынан тарта күчүнө кирген "Россия Федерациясындагы чет элдик жарандардын укуктук жобосу" жана "Россия Федерациясында мамлекеттик дактилоскопиялык каттоодон өтүү" федералдык мыйзамдары бардык чет элдиктерге тиешелүү. Анын ичинде ЕАЭБ өлкөлөрүнө дагы. Ага ылайык чет элдиктер медициналык кароодон өтүп жана манжа изин калтыруусу керек. Эмгек мигранттары бул иштерди көп функциялуу "Сахарово" миграциялык борбору аркылуу жасашат. Ал эми иш сапарга, конокко келгендер эгер 90 күндөн ашуун убакыт Россия Федерациясында жүрө турган болсо, аталган эки мыйзамдын талаптарын аткарууга милдеттендирилет. Бирок "Сахарового" барбай эле атайын белгиленген 17 медициналык мекемелердин бирине кайрыла берсе болот. Учурда алардын 13ү лицензия алып иштеп жатышат. Даректери "Сахарово" миграциялык борборунун сайтында бар", — деди Букалаев.
Консул мыйзамга бүгүнкү күндө толуктоолор кирип жатканын, ага ылайык айрым маселелер алдыда дагы такталып жаткандыгын кошумчалады.
Белгилей кетсек, 2021-жылдын 29-декабрынан тарта Россияда "Россия Федерациясындагы чет элдик жарандардын укуктук жобосу" жана "Россия Федерациясында мамлекеттик дактилоскопиялык каттоодон өтүү" деп аталган эки мыйзамы күчүнө кирген. Андагы көрсөтүлгөн талаптарды аткарууда ЕАЭБ өлкөлөрүнүн жарандарына көп функционалдуу "Сахарово" миграциялык борборунда "А2" деп аталган өзүнчө коридор ачылган. Бул мыйзам Россияга өткөн жылдын 29-декабрынан кийин кирген жарандарга гана тиешелүү.