Учурда пенсиянын 40 пайызы дыйкандарга төлөнүп берилет. Ошол эле учурда алардын камсыздандырууга төккөн каражаттары бир пайызга жетпейт. Бул тууралуу Теңизбек Абжапаров Sputnik Кыргызстан радиосунда маек куруп жатып билдирди.
Анын айтымында, азыркы мыйзам боюнча дыйкандар пенсиялык фондго айына жети сом которсо, юридикалык жактын орточо 20 000 сом айлык алган кызматкери 5 000 сомдон ашык каражат которот.
"Азыр бир гектар сугат жерге киши башына жылына 350 сом төлөнөт. Эгер жер жайыт, кайрак же көп жылдык өсүмдүк эгилген болсо, анда 200, 170 сом гана төлөйт. Бул жылдык эсепти киши башына бөлө келгенде айына жети сом келечектеги пенсиясына которгон болуп калат. Ошол эле учурда 20 000 айлык алган мугалим ай сайын маянасынын 5 000 сомдон ашыгын камсыздандырууга которууда. Мындай теңсиздикти жоюу максатында биз сунуштаган мыйзам долбоорунда ири ишканаларды чыгарып салып эсептегенде, республикада орточо айлык 12 000 сом деп алынган, дыйкандар ушул маянанын алты пайызын которуусу сунушталып жатат. Ошондо жылына эмес, айына киши башына 700 сом төлөп калышат. Эгер дыйкандын бир гектардан аз жери болсо, ыктыярдуу түрдө орточо айлыктын үч пайызын, башкача айтканда, киши башына айына 350 сом төгүп, стаж жыйнаса болот", — деди Абжапаров.
Ал сумманы көтөрүү фермерлердин кийин пенсияга чыкканда көбүрөөк каражат алуусу үчүн көрүлүп жаткан аракет экендигин кошумчалады.