БИШКЕК, 23-фев. — Sputnik. Чоң-Алай районунун тарыхы, географиялык абалы, климаттык өзгөчөлүктөрү, флора, фаунасы жана райондон чыккан белгилүү инсандардын өмүр таржымалы жазылган энциклопедия жарык көрдү.
Энциклопедиянын түзүүчүсү, тарых илимдеринин кандидаты Акматбек Маматкаимовдун айтымында, бул эмгекти даярдоого он жылдай убакыт кеткен.
Чоң-Алай районунун тарыхы, географиялык абалы, климаттык өзгөчөлүктөрү, флора, фаунасы жана райондон чыккан белгилүү инсандардын өмүр таржымалы жазылган энциклопедия жарык көрдү
© Фото / Назгүл Бостонбаева
"Энциклопедияны түзүү жөндөн-жөн эле ишке ашкан жок. Студент кезимден бери Чоң-Алай өрөөнүнүн тарыхын изилдеп келе жатам. Демилгечи топ кийин мага ишеним көрсөтүп, бул ишти тапшыргандан кийин болгон маалыматтарды чогултуп, терең изилдөөгө туура келди. Кыйынчылыгы – архивдик материалдарды топтоо болду, себеби көп убакытты алды. Экинчиден, китептин ичине кандай маалыматтар кирсе, ар бирин өз көзүм менен көрүп, сүрөтчүнүн, жазуучунун, географтын, ботаниктин, айтор, көп тармактуу адистин көз карашы менен жаздым. Ар бир материалды фактынын негизинде бергенге аракет кылдым. Өзүм Чоң-Алайда туулуп-өссөм да бул өрөөндүн бай тарыхы, башка аймактарга көп окшой бербеген климаттык, каада-салттык өзгөчөлүктөрү мен үчүн жаңы ачылыш болду", — деди Маматкаимов.
Ал китепти чыгарууда окумуштуулар, тарыхчылар менен бир нече жолу талкуулар уюштурулуп, алардын сынына коюлгандыгын кошумчалады. Эмгекти түзүүгө жалпы 40 чакты кызматкер жардамдашкан. Энциклопедияга мамлекеттик ишмер, окумуштуу, академик Абдыганы Эркебаев башкы редакторлук кылган. 700 беттен турган китеп "Турар" басмаканасынан 1 500 нускада жарык көргөн.
Чоң-Алай 1992-жылы Алай районунун курамынан бөлүнүп чыгып, өз алдынча район болуп түзүлгөн. Деңиз деңгээлинен 2 240-3 100 метр бийиктикте турат. Үч айыл өкмөт, 22 айыл бар. Соңку маалыматтарга таянсак, 33 миңге чукул адам жашайт.