БИШКЕК, 21-фев. — Sputnik. Нарын облусундагы Ак-Талаа районунун Ак-Кыя айылында Асанаалы Абдраимов атындагы орто мектептин жаңы курулган имараты пайдаланууга берилди. Бул тууралуу президенттин Нарын облусундагы ыйгарым укуктуу өкүлүнүн маалымат кызматы кабарлады.
Абдраимов атындагы орто мектептин эки корпусу жараксыз абалга келгендиктен республикалык бюджетке киргизилип, 2017-жылдын октябрь айында курулуш иши башталган. 67 миллион сомго 275 орундуу заманбап имарат быйыл курулуп бүттү.
Иш-чарага катышкан облус жетекчиси Сабыркул Ашимбаев аталган мектептен Кыргызстандын намысына жараган улуу инсандар өсүп чыгуусун тилек кылды. Ошондой эле быйыл мамлекет тарабынан ар бир райондо 4-5тен социалдык объектиге каражат бөлүнөрүн, андыктан мындай ачылыштар башка аймактарда да болорун маалымдады.