Улуу Британияда 18-февраль күнү соңку жылдары болуп көрбөгөндөй катуу шамал болгон. Өлкөдө кооптуулуктун "кызыл" деңгээли жарыяланган.
Жергиликтүү ЖМКлардын маалыматы боюнча, шамалдын ылдамдыгы саатына 145 чакырымга жеткен. Ошого карабай кээ бир учактар Лондондогу аэропортко конуп жатты.
Бороон учурунда он миңдеген соцтармак колдонуучулары британиялык энтузиаст Жерри Дайердин Big Jet TV деп аталган YouTube каналынан түз эфирди көрүп отурган. Ал Хитроу аэропортуна конууга аракет кылып жаткан самолетторду көрсөтүп, спорттук комментатор сыяктуу кырдаалды баяндап берген.
Кээ бир учактар жерге коно албай запастагы аэропортко кеткен. Ал эми Airbus A380 лайнеринин үч жолку аракетинен кийин араң конгон учуру кызыктуу ирмем болуп калды.
Түз эфир маалында 200 миң адамдай көрүп отурган. 20-февралга карата сегиз саатка созулган видеону 7,1 миллион интернет-колдонуучу көрдү.