БИШКЕК, 17-фев. — Sputnik. Жакынкы чет өлкөдөгү белгилүү спортчулар жана машыктыруучулар россиялык фигурист Камила Валиеваны колдоп чыгышты. Алар Sputnik агенттигине курган маегинде спортчу кызды мактап, дем беришти.
Өзбек гимнасты, 1992-жылкы Олимпиада оюндарынын чемпиону Оксана Чусовитина спортчу эң башкысы өзүнө жагышы керектигин белгиледи.
"Сага ийгилик каалайм. Эң башкысы, өзүң үчүн, өзүңдүн жан дүйнөң үчүн муз үстүндө бийле. Биз сени мененбиз. Сен мыктысың", — деди Чусовитина.
Молдовалык жеңил атлетчи Светлана Шепелева дагы Камила азамат кыз экенин белгиледи. Ал эми Олимпиада оюндарынын эки жолку байге ээси Ирек Зиннуров Камила үчүн тынчсызданып жатканын айтты.
"Сабырдуулук жана ийгилик каалайм. Биздин спорт эң таза спорттордун бири экенин жана өзүңдүн дагы мыктылыгыңды далилдешиңди тилейм", — деди Зиннуров.
Еревандагы муз үстүндөгү бий спорту боюнча мектебинин машыктыруучусу Элен Амбарцумян бул жагымсыз көрүнүш спортчу кыздын карьерасына терс таасир этпей турганына үмүт артарын белгиледи.
"Камила өтө кыйын фигурист. Бул окуя анын карьерасына терс таасирин тийгизбейт деп үмүттөнөм. Музыканы бир дагы спортчу Валиевадай сезе албайт. Муз үстүндөгү чеберчилиги бир укмуш", — деди ал.
Беларустук фехтовальщик, 1998-жылкы Олимпиада оюндарынын чемпиону Александр Романько дагы спортчу кызга колдоо сөзүн айтып, спорт бул аскерлердей эле мамлекетти коргоо экенин кошумчалаган.
Эске салсак, өткөн аптада допинг-тест алып текшерген эл аралык агенттик Валиевадан 25-декабрда кызытма боюнча алынган тесттен триметазидин заты чыккандыгын билдирген. Тесттин жыйынтыгын Стокгольмдогу антидопинг лабораториясы 8-февралда берген.
Ага карабай Спорттук арбитраждык соту (СAS) россиялык 15 жаштагы фигурист Камила Валиеваны мындан ары Олимпиада-2022 оюндарына катыштыра берүү чечимин кабыл алган.
CAS берген релизде Валиеваны Олимпиада-2022нин жеке турнирине чейин катыштыруу чечими "корголгон персона" (спортчу 16 жашка чыга элек) макамы башкача мамиле жасоону эске алуу менен кабыл алынганы айтылат.
Валиева буга чейин Россиянын курама командасына кирип, ийгилик жаратып Олимпиада чемпиону болгон, бирок сыйлоо аземи али күнчө өтө элек. Кечээ кечинде ал кыска программа боюнча турнирге катышты. Ал эми эркин программасын 17-февралда көрсөтөрү маалымдалган.