БИШКЕК, 13-фев. — Sputnik. Ош шаарында Ата мекенди коргоо күнүнө карата волейбол боюнча турнир уюштурулат. Бул туурасында мэриядан билдиришти.
Маалыматка ылайык, мелдеш эркектер арасында 18-19-февраль күндөрү "Кыргызстант — Иран" достук спорт комплексинде өтөт.
Командалар үч топко бөлүнөт:
Шаардык жана муниципалдык ишкана, кызматтардын, анын ичинде күч түзүмдөрүнүн, саламаттык сактоо, билим берүү мекемелеринин, коомдук уюмдардын кызматкерлери, шаардын жай тургундары;
Жогорку жана орто кесиптик билим берүү мекемелеринин, колледждердин мугалимдери;
Жогорку жана орто кесиптик билим берүү мекемелеринин, колледждердин студенттери.
Турнирге катышуу үчүн Шаардык дене тарбия жана спорт комитетине 18-февралга чейин табыштама берүү шарт.
Спорттук иш-чаранын максаты — республикалык жана эл аралык мелдештерге алып баруу үчүн Ош шаарындагы мыкты волейболчуларды тандап алуу. Ошондой эле сергек жашоо образын жана спортту пропагандалоо, майрамдык маанай тартуулоо максатын көздөйт.