БИШКЕК,11-фев. — Sputnik. Бишкектин Свердлов райондук соту Жогорку Кеңештин депутаты Акбөкөн Таштанбековго карата козголгон кылмыш ишин токтотту. Бул тууралуу соттун маалымат кызматы кабарлады.
Чечим 11-февралда чыккан.
Таштанбеков парламенттик шайлоого № 30 Ысык-Ата шайлоо округунан депутаттыкка талапкер болуп катышкан. Шайлоо бүткөн соң ага улуттар жана аймактар аралык кастыкты козутууга аракет кылган деген айып тагылып, кылмыш иши козголгон болчу. 6-декабрда Биринчи май райондук сотунун чечими менен талапкер кармалып, кийин УКМКнын тергөө абагына которулган. Андан соң Свердлов райондук сотунун чечими менен УКМКнын тергөө абагынан чыгарылган.