БИШКЕК, 9-фев. — Sputnik. Улуттук банк Зергерлер жана ишкерлер союзунун Sputnik Кыргызстан агенттигинде берген брифингиндеги билдирүүлөр боюнча үн катты.
Зергерлер Улуттук банк алтынды Лондон биржасынан кымбат сатарын айтып, мындан улам зер буюмдарды даярдоо жана өндүрүү пайда алып келбесин кошумчалашкан.
Бышкы банктан түшүндүрүшкөндөй, алтын куймаларын (1 граммдан 100 граммга чейин) чыгаруунун негизги максаты — аманаттар менен инвестициянын альтернативалуу инструментинин рыногун түзүү. Андыктан алтын куймалар кайра сатып алуу мүмкүнчүлүгү менен сатылат.
"Учурда Улуттук банктын алтын куймалары каражатты сактоо, аны инфляциядан коргоо үчүн колдонулат. Ошондой эле баалуу белек катары катары пайдаланса болот", — деп айтылат түшүндүрмөдө.
Өлкөнүн башкы банкы 1-февралдан тарта салмагы 10,9 килограммдан 13,4 килограммга чейинки алтын куймаларды сата баштаганын маалымдаган. Куйманын салмагынын 99,95 пайызын химиялык таза металл түзөт. Алтындын баасы Лондондогу баалуу металлдар рыногунун ассоциациясы өткөн кечте көрсөткөн баага жана сомдун долларга карата курсуна жараша бекитилет.