Эхинококкоз менен ооруган адамдар 3-5 жылга чейин каттоого алынса, альвеококкоз менен жабыркагандар өмүр бою көзөмөлдө болот. Себеби эхинококкоз ыйлаакча түрүндө өрчүсө, альвеококкоз рак сымал организмди жабыркатат. Мунун "паразиттик рак" деген да аталышы бар. Бул тууралуу Жыпара Ашакеева Sputnik Кыргызстан радиосунда маек куруп жатып билдирди.
Анын айтымында, эхинококкоз оорусу адамда көп жылдап билинбей өрчүй бергенин эске алуу менен ар бир адам алты айда бир медициналык кароодон өтүп коюшу зарыл.
"Паразитардык оорулардын ичинен эхинококкоз абдан олуттуу илдет болуп саналат. Себеби операция жолу менен гана дарыланат. Азыркы күндө Бишкек шаарында өткөн жылдын жыйынтыгы менен 364 учур катталды. 2020-жылга (314 учур) салыштырмалуу илдет көбүрөөк болду. Бейтаптардын ичинен 84ү кичинекей балдар. Январга карата берилген маалыматка ылайык, 27 адам операция болду. Алардын ичинде төртөө — шаардын тургундары. 10 киши эхинококкоздон жакшы болуп кайра ооруп калган. Эхинококк адамга көп учурда иттен жугат. Ооруну алдын алуу үчүн иттерге азинокс таблеткасын берип дегельминтизациялап туруу керек. Эхинококкоздун жумурткалары тышкы чөйрөгө абдан туруктуу. Андыктан өздүк гигиенага көңүл буруу маанилүү. Ылаңдаган малдын боорун, өпкөсүн итке бербей, жерге терең көмүп салуу сунуш кылынат. Андан тышкары, сөзсүз түрдө сууну кайнатып, жашылча-жемишти таза жууп жеш керек. Бул бардык мите курттардан сактанууга жардам берет", — деди Ашакеева.
Ал эгерде эхинококкоз оорусунун башталышында дары-дармектерди туура пайдаланса, дартты айыктыруу мүмкүн экенин, ал эми өтүшүп кеткен учурда хирургиялык жол менен дарылоо талап кылынарын кошумчалады.