БИШКЕК, 8-фев. — Sputnik. Зергерлер жана ишкерлер союзунун президенти Сталбек Акматов "Баалуу металлдар жана асыл таштар жөнүндө" мыйзам долбоорун кайтарып алууну өтүнүп жатат. Ал Sputnik Кыргызстандын маалымат борборунда өткөн "Зергерчилик тармагы коркунучта — бизнес өндүрүшкө тынчсызданууда" аталышындагы брифингге катышты.
Зергердин айтымында, сөз болуп жаткан мыйзам долбоорун Финансы министрлигине караштуу Баалуу металлдар департаменти 2016-жылы иштеп чыккан. Бирок Жогорку Кеңештин комитети быйылкы жылдын 25-январында карады.
"Бул долбоор туура эмес. Аналитикалык маалым катта бул документ өндүрүштү жана сооданы көбөйтүүгө арналганы айтылат. Ошол эле учурда сырьёго көйгөйсүз жетүү боюнча нормалар жок. Долбоордо "ченөөчү стандарттык куймалар", "зер буюмдарды өндүрүүчү" деген терминдер жок. Мындан улам комитет күн тартибинен алып, адистердин пикирин кошуп, кайра иштеп чыгууну сунуштады", — деди Акматов.
Анын айтымында, учурда департамент өзгөртүү киргизүүдөн качып, документти концептуалдык түрдө кабыл алдырууга умтулуп жатат. Анын ордуна Акматов түшүнүктүү жана кынтыксыз иштелип чыккан мыйзамды кабыл алуу керектигин кошумчалады.
"Былтыр Өзбекстан зергерчилик тармагы боюнча уникалдуу мыйзам кабыл алды. Мындан улам жаңы ишканалар ачылып, инвесторлор тартылды. Эгер коңшулар менен атаандаш болобуз десек, ушул сыяктуу мыйзам болушу шарт. Бул жерде зергерлердин Кумтөрдүн алтынына колу жетери тууралуу дагы айтылышы керек", — деди жетекчи.
Сөзүнүн соңунда ал зергерлер мыйзам долбоорун чакыртып алып, кайра иштеп чыгууну сунуштап жатканын билдирди.