Министрлер кабинети түзүүнү пландап жаткан аткаминерлерди мамлекеттик жана муниципалдык кызматтарга ишке алууга тыюу салган "кара тизме" "Мамлекеттик жарандык кызмат жана муниципалдык кызмат жөнүндө" мыйзамына каршы келет. Бул тууралуу Самат Ашымов Sputnik Кыргызстан радиосунда маек куруп жатып маалымдады.
Анын айтымында, эгер саясий кызматка алууда мурда алешемдик кетирип кызматынан четтетилген аткаминерлердин "кара тизмеси" түзүлсө, ал ачык маалымат болушу шарт.
"Мамлекеттик же муниципалдык кызматка алуудагы "кара тизме" мурда деле бар болчу. Мамлекеттик кадр кызматы иштеп турганда мамлекеттик органдар соттолгон же башка себептери менен ээлеген кызматынан бошотулган аткаминерлердин тизмесин аталган органга берип турчу. Анын негизинде алар конкурска катышуу укугунан ажыратылып, тигил же бул кызматка келүүсү чектелип калчу. Мына ушундай борборлоштурулган бирдиктүү система иштечү. Азыр болсо ар бир министр же жетекчи кызматка өзү алат. Ал адам "кара тизмеде" экенин кантип билет? Бул биринчи маселе. Экинчиден, "Мамлекеттик жарандык кызмат жана муниципалдык кызмат жөнүндө" мыйзамынын "Мамлекеттик жарандык кызматтан жана муниципалдык кызматтан терс негиздер боюнча бошотулган адамдардын реестри" деп аталган 34-беренесинде "Мамлекеттик жарандык кызматтан жана муниципалдык кызматтан терс негиздер боюнча бошотулган адамдардын реестринин маалыматтары кызматка кирүүдө баш тартуу үчүн негиз болушу мүмкүн эмес" деп жазылып турат. Бул өкмөт түзгөн кара тизмеде болсо деле мамлекеттик ишке алына берет дегенди түшүндүрөт. Мына ушул беренеге таяп, соттон утуп кайра эле саясий кызматтарга келе беришет. Андыктан аткаминерлердин "кара тизмеси" түзүлө турган болсо, алгач мыйзамды, укуктук-нормативдик актыларды тууралап, бир топ олуттуу механизмдерди иштеп чыгуу зарыл. Ошондой эле бул тизме бардык мамлекеттик органдар үчүн ачык болушу шарт. Алар өздөрүндө иштөөгө келип жаткан кызматкердин "кара тизмеде" бар-жогун көрө ала тургандай болушу керек", — деди Ашымов.
Ал буга чейин аракеттер көрүлүп келген люстрация менен "кара тизменин" кескин айырмачылыгы бар экендигин кошумчалады.
Эске сала кетсек, министрлер кабинети мамлекеттик жана муниципалдык кызматтарга ишке алууга тыюу салынган "кара тизме" түзүүнү пландап жатат. Мындай демилге 2026-жылга чейин Кыргыз Республикасын өнүктүрүүнүн улуттук программасын ишке ашыруу боюнча бекитилген планда жазылган.