БИШКЕК, 3-фев. — Sputnik. Кыргызстан республикага тейлөө жана өндүрүш тармагындагы гана эмес, мектептерге, ооруканаларга, мамлекеттик мекемелерге чет өлкөлөрдө жүргөн мыкты кадрларды кайтарууга умтулуп жатат. Бул тууралуу министрлер кабинетинин төрагасынын орун басары Эдил Байсалов билдирди.
Ал президенттин "Миграциялык кырдаалды жакшыртууга багытталган чараларды кабыл алуу жөнүндө" жарлыгын ишке ашыруунун алкагында тиешелүү жетекчилерге жыйын өткөрдү. Анда чет өлкөдө жарандарды ишке орноштуруу тутумун өнүктүрүү талкууланган.
"Кыргызстан республикага тейлөө жана өндүрүш тармагындагы гана эмес, мектептерге, ооруканаларга, мамлекеттик мекемелерге мыкты кадрларды кайтарууга умтулууда. Бирок жакынкы жылдары бизде жаштардын эсебинен жумушчу күчү ашыкча болот. Ошол учурда алардын чет өлкөдөн жакшы маяналуу жумушка орношуусуна аракет кылып жатабыз. Ал жактан тажрыйба топтоп келиши керек", — деди Байсалов.
Кеңешменин жыйынтыгы боюнча мамлекеттик органдарга мекендештерге сапаттуу юридикалык көмөк көрсөтүү, камсыздандырууну киргизүү жана мыйзамдуу түрдө жумушка орноштурууну жеңилдетүү жаатында тапшырмалар берилди.
Ошондой эле виза режимин жеңилдетүү жана ишке чыгуу мүмкүнчүлүгү боюнча келишим түзүү иштерин тездетүү тапшырылды.