Мугалим балага билимден сырткары тарбия да берет. Мектептерге окутуунун улуттук усулдарын киргизмейин окуучу менен мугалимдин ортосундагы конфликт токтобойт. Мындай пикирин Орозали Сайдилканов Sputnik Кыргызстан радиосунда маек куруп жатып билдирди.
Анын айтымында, гумандуу педагогиканын үч негизги эрежеси бар.
"Гумандуу педагогика — бул учур талабы, азыркы коомдун көз карашына туура келген тарбия ыкмасы. Мектептер балага билим берүү менен эле чектелбейт, мугалим баланы тарбиялайт дагы. Албетте, ата-энелер менен эриш-аркак иштешкенде гана бул жакшы натыйжа берет. Гумандуу педагогиканын үч негизги эрежеси бар. Алар баланы сүйө билүү, түшүнө билүү жана балага ишене билүү. Азыр педагогдор көбүнесе түшүнө билүүдөн ката кетиребиз. Түшүнө билүү дегенге тарбиялоо, окутууда баланын оюн, пикирин уга билүү, анын жан дүйнөсүндөгү өзгөрүүлөрдү байкоо, алар менен эсептешүү кирет. Экинчиден, биз ар бир окуучуну өз балабыздай сүйүп, мээрим төгүп иш алып барышыбыз зарыл. Ошол эле маалда ага жоопкерчилик артып, ишеним менен мамиле кылуу милдетибизге кирет. Мына ушул үч эрежени аткара алган мугалим эч убакта бала менен конфликтиге барбайт. Албетте, бул кадамдардын аткарылышына мугалимдин социалдык абалы, башкача айтканда, алган маянасы, түзүлгөн иш шарты да таасир этет", — деди Сайдилканов.
Педагог ата-энелер да өз милдетин так аткарып, мугалим менен тыгыз иштешип жоопкерчиликтүү мамиле кылышы зарылдыгын кошумчалады.