Кыргыз-тажик чек арасындагы чырдын көбү Төрт-Көчө тилкесинде чыгат. Эки өлкө талашып жаткан жол канчалык маанилүү? Sputnik Кыргызстан буга жооп алууга аракет кылды.
Президенттин Баткен облусундагы өкүлү Абдикарим Алимбаев ушул тапта Төрт-Көчө укуктук негизде аныктала элек талаштуу тилке экенин эске салды. Бирок тажик тарап ээлик кылууга аракет кылып жатканын белгиледи.
"Жолду тосуп алуу мыйзамсыз. Себеби Төрт-Көчө тилкеси азырынча эч кимге таандык эмес. Азыркы учурда Тажикстандын жарандары да, Кыргызстандын жарандары да колдонот. Чек ара бир тараптуу чечилбеши керек. Сөзсүз түрдө маселе эки тараптуу чечилет. Бүгүнкү күндө, тилекке каршы, тажик тарап Төрт-Көчө тилкесин Тажикстандын аймагы деп эсептөөгө аракет кылып жатат. Бирок мунун баары мыйзамсыз. Учурда өкмөттөр аралык комиссия иштеп жатат. Маселе чечилет деп үмүт кылам", — деди Алибаев.
Сөз болуп жаткан тилке Баткен районунун Орто-Боз айылында жайгашкан. Жергиликтүү жашоочулар Төрт-Көчө абдан маанилүү экенин айтышат. Эгер тилке коңшу өлкөнүн көзөмөлүнө өтүп кетсе, Лейлек толугу менен, Баткен районунун жарымы Кыргызстандан бөлүнүп калат.
68 жаштагы Миталип Мамытов бул стратегиялык жол эл үчүн өтө маанилүү экенин билдирди.
"Бул касиети өтө күчтүү, стратегиялык жол. Бишкектен чыксаң түптүз Исфанага барасың. Бизге эң керектүү жол. Эгер коңшулар жолго ээлик кылып калса, анда Лейлек, Баткен районунун жарымы анклавда калып кетет. Мына тоонун аркасына бир жол салган. Бирок 60 литр бензиниң болбосо ал жак менен Баткенге бара албайсың", — деди Мамытов.
Кыргызстан альтернатива катары Ак-Сай — Тамдык айланма жолун сала баштаган. Ортодо улам чыр чыга берип, бул трасса дагы толук курулуп бүтө элек.
Тема боюнча: