БИШКЕК, 29-янв. — Sputnik. УКМК төрагасы Камчыбек Ташиев тажик тарап менен болгон сүйлөшүүдөн соң жергиликтүү эл менен жолугуп, Тажикстан менен чек ара каттамы кандай шартта ачыларын түшүндүрдү.
Эске салсак, кыргыз-тажик чек арасындагы чырдан улам Ташиев учурда Баткен облусунда жүрөт.
"Чек арага делимитация, демаркация жүргүзүп, мыйзамдарды кабыл алып, Жогорку Кеңеште ратификациядан өткөрүп, президентке колду койдуруп, зым-тор тартып бүтмөйүн мындай чыр боло берет. Эң оболу ушул маселени бүтүрөлү деп кесиптешим менен кол алыштык. Эгер кайсыл бир жер чечилбей кала турган болсо, ал жерди таштап коюп кете беришет. Чечилбей калган жерге Ятимов экөөбүз отурабыз дагы карайбыз, сөзсүз түрдө бир чечимге келебиз. Ушул маселелер аткарылган соң тажик тарап менен чек араны ачабыз, ынтымакта жашайбыз. Талаша турган эч нерсе болбойт. Ошондо эл бири-бирине каттап калат", — деди Ташиев.
Чек арадагы жаңжалдын чоо-жайы
27-январь күнү саат 17:50 чамасында Төрт-Көчө аймагына тажик жарандары оор жүк ташуучу автоунаага таш жүктөп келишкен. Аны Баткен — Исфана автожолуна түшүрүп жолду жаап, өздөрү ошол жерде Тажикстандын чек арачыларынын коштоосунда жүрүшкөн. Эки өлкөнүн чек ара өкүлдөрүнүн жолугушуусунун жыйынтыгында жол каттамы ачылган. Кырдаалды жөнгө салуу аракетине карабастан тажик тарап чек аранын башка аймагында, тактап айтканда, Чыр-Дөбө деп аталган жерде Кыргызстандын аскер кызматкерлерин көздөй миномёт жана гранатомёттордон ок чыгарышкан. Андан кийин тажик чек арачылары Төрт-Көчө аймагында Кыргызстандын аскерлерди аткылаган. Чек ара кызматы Тажикстандын аскер кызматкерлеринин аракеттери жеринен координацияланганы, алардын бул чагымчылдык аракетке мурдатан даярдык көргөнү байкалганы айтылган.
Ал эми коңшу өлкө башаламандык Сомониён айылынан Чоркухка бараткан тажикстандыктар ташка алынганынан улам чыкканын айтып жатат. Кийинчерээк Тажикстандын УКМКсы окуя Ходжаи-Аъло аймагынан Сомониёнго кетчү жолдо болгонун кабарлаган. Алардын айтымында, кыргызстандыктар тажикстандык жарандын Porter автоунаасын токтотушкан. Sputnik Тажикстан агенттигинин жазганына караганда, эки киши каза таап, 10 адам ар кандай жаракат алган.
Таңга маал эки тараптын чек арадагы атышууну жөнгө салуу боюнча сүйлөшүүсү аяктап, бир нече пунктудан турган макулдашуу кабыл алынды. Анын ичинде ок атууну токтотуу да каралган.
Кечээ эртең менен жерине УКМК төрагасы Камчыбек Ташиев менен өзгөчө кырдаалдар министри Бообек Ажыкеев барган.