БИШКЕК, 28-янв. — Sputnik. УКМК төрагасы Камчыбек Ташиев кыргыз-тажик чек арасында учурда абал туруктуу экенин айтты.
Эске салсак, Ташиев учурда Баткен облусунда. Журналисттердин суроосуна жооп берип жатып УКМК төрагасы кыргыз-тажик чек арасындагы абал президенттин көзөмөлүндө экенин белгилеген.
"Бүгүн саат 11:00дө тажик тарап менен жолугушуу болот. Анда чек ара маселеси чечилет. Бул окуя түнү менен президент Садыр Жапаровдун көзөмөлүндө болду. Азыркыга чейин ал биз менен түз байланышта. Кечээки чек ара окуясынан аскер кызматкерлери жана карапайым эл арасында жоготуулар болгон эмес. 11 аскер кызматкери жабыркаган. Алар учурда ооруканада. Эвакуацияланган элди ӨКМ бардык нерсе менен камсыздады", — деген Ташиев.
Ал кыргыз-тажик чек арасында чыккан чырды иликтөө боюнча атайын комиссия түзүлгөнүн кошумчалады.
"Азыр президенттин тапшырмасы менен комиссия түзүлдү. Алар чек арада болгон окуянын баарын териштирип чыгат. Учурда чек арада кырдаал салыштырмалуу турукташты. Бардык күч түзүмдөрү, аскер техникалары боюнча маселе саат 11:00дө болчу сүйлөшүүлөрдөн кийин чечилет. Абал турукташты деп ойлойм", — деди Ташиев.
Чек арадагы жаңжалдын чоо-жайы
27-январь күнү саат 17:50лөр чамасында Төрт-Көчө аймагына тажик жарандары оор жүк ташуучу унаага таш жүктөп келишкен. Алар таштарды Баткен — Исфана автожолуна түшүрүп жолду жабышкан жана Тажикстандын чек арачыларынын коштоосунда жүрүшкөн. Эки өлкөнүн чек ара өкүлдөрүнүн жолугушуусунун жыйынтыгында жол каттамы ачылган. Кырдаалды жөнгө салуу аракетине карабастан тажик тарап чек аранын башка аймагында, тактап айтканда, Чыр-Дөбө жерлигинде Кыргызстандын аскер кызматкерлерин көздөй миномёт жана гранатомёттордон ок чыгарышкан. Андан кийин тажик чек арачылары Төрт-Көчө жерлигинде Кыргызстандын аскер кызматкерлерин көздөй ок атышкан. Чек ара кызматы Тажикстандын аскер кызматкерлеринин аракеттери жеринен координацияланганы, алардын бул чагымчылдык аракетке мурдатан даярдык көргөнү байкалганы айтылган.
Ал эми коңшу өлкө башаламандык Сомониён айылынан Чоркухка бараткан тажикстандыктар ташка алынганынан улам чыкканын айтып жатат. Кийинчерээк Тажикстандын УКМКсы окуя Ходжаи-Аъло аймагынан Сомониёнго кетчү жолдо болгонун кабарлаган. Алардын айтымында, кыргызстандыктар тажикстандык жарандын Porter автоунаасын токтотушкан. Коңшу өлкөнүн ЖМКлары жабырлануучулар тууралуу ар кандай маалымат берип жатышат. Sputnik Тажикстан агенттигинин жазганына караганда, эки киши каза таап, 10 адам ар кандай жаракат алган.
Таңга маал эки тараптын чек арадагы атышууну жөнгө салуу боюнча сүйлөшүүсү аяктап, бир нече пунктудан турган макулдашуу кабыл алынды. Анын ичинде ок атууну токтотуу дагы каралган. Кыргызстандын Саламаттык сактоо министрлигинен билдиргендей, чек арада чыккан жаңжалдан жабыркаган кыргызстандыктардын саны 11 кишиге жетти. Алардын бардыгы аскер адамдары.
Бүгүн саат 8.00гө карата кыргыз-тажик мамлекеттик чек ара аймагындагы Самаркандек, Төрт-Көчө, Көк-Таш, Дахма, Көчө-Бою жана Головной аймактарында кырдаал туруктуу деп мүнөздөлдү.