БИШКЕК, 27-янв. — Sputnik. Кыргыз-тажик чек арасындагы атышууда Тажикстандын үч чек арачысы жаракат алып, ооруканага жеткирилди. Бул тууралуу Sputnik Тажикстан жазды.
Учурда Кыргызстан тараптан жаракат алгандар тууралуу маалымат бериле элек.
Ал эми Саламаттык сактоо министрлигинин маалымат кызматы чек арадагы атышууда ооруканага жаракат алгандар түшпөгөнүн билдирди. Ошондой эле саламаттык сактоо мекемелери жогорку даярдыкта экени белгиленди.
Эске салсак, УКМКнын Чек ара кызматы саат 17:30дан 18:00гө чейинки убакыт аралыгында Тажикстандын чек арачылары Баткен районуна караштуу Төрт-Көчө аймагындагы Баткен — Исфана жолунун бир бөлүгүн бир тараптуу жаап салганын билдирген. Кыргызстан менен Тажикстандын чек ара өкүлдөрүнүн сүйлөшүүсү менен саат 19:30да жол ачылган. Бирок 19:35те абал кайра курчуп, Тажикстандын аскерлери Баткен районунун Чыр-Дөбө аймагында ок атуучу куралдарын колдонгон.
Кыргызстан менен Тажикстандын чек ара бөлүктөрүнүн аскерлеринин атышуусу Төрт-Көчө жана Чыр-Дөбө аймактарында болууда. Тажик тарап миномёт жана гранатомёт колдонуп жатканы айтылды. Чек ара кызматы кыргыз-тажик чек арасындагы абал чыңалып турганын билдирген.
Ал арада Баткенде чек арага жакын жашаган айрым айылдын тургундары коопсуз жайга көчүүдө.