БИШКЕК, 27-янв. — Sputnik. Мамлекеттик салык кызматы 2021-жылдын жыйынтыгы боюнча Бирдиктүү салык декларациясын кабыл алуу кампаниясын баштады. Бул тууралуу мекеменин маалымат кызматы кабарлады.
Билдирмеге караганда, кезектеги декларациялык кампания эки этап менен өтөт. Анда 1-мартка чейин юридикалык жактар, 1-апрелге чейин жеке жактар тапшырышы керек.
"Алар 2021-жылы алынган кирешелери, жер участоктору, мүлк объектилери, экономикалык ишмердиги тууралуу салык органдарына отчёт берүүлөрү керек", — деп айтылат маалыматта.
Бирдиктүү салык декларациясын тапшыруу убактысы:
2022-жылдын 1-мартына чейин ата мекендик уюмдар, дыйкан жана фермердик чарбалар, туруктуу мекемесин түзүү менен Кыргызстанда иштеген чет өлкөлүк уюмдар тапшырууга милдеттүү.
1-апрелге чейин мамлекеттик жана муниципалдык кызматкерлер, жеке ишкерлер, менчигинде салык салынуучу кыймылдуу (транспорт), кыймылсыз (батир жана үй) мүлкү жана жер участогу (короо-жай участкаларынан башка) бар жеке жактар тапшырышы керек. Ошондой эле юридикалык жакты түзбөй туруп иштеген дыйкан жана фермердик чарбалар да декларация тапшырууга милдеттүү.
Мекеме декларация 2021-жылдын 31-декабрына карата аныкталган форма жана мөөнөттөргө ылайык берилерин айтып, кийинки жылдан тартып жаңы форма, мөөнөт коюларын кошумчалады.
Толук маалыматты 116 номурунан же www.sti.gov.kg сайтынан алууга болот.