БИШКЕК, 25-янв. — Sputnik. Бул жылы Камбар-Ата-1 ГЭСинин курулушу башталат. Бул тууралуу министрлер кабинетинин төрагасы Акылбек Жапаров билдирди.
Анын айтымында, бул иш энергия кубаттуулугун көбөйтүү үчүн жасалууда. Инфраструктураны куруу үчүн 18,8 миллион доллар талап кылынат. Ал эми алгачкы генератор ишке кирүүсү үчүн 486 миллион доллар сарпталмакчы.
"Курулуш иштери качан башталары жаратылыш шарттарынан жана долбоорчулардан көз каранды. Техникалык-экономикалык негиздеме даяр. Бирок инфраструктураны эске алуу менен долбоордук-сметаны жаңылап чыгуу керек", – деди Жапаров.
Анын айтымында, курулуш иштерине кеткен акча бюджеттен тышкары, инвесторлордон алынат.
"Казакстан менен Өзбекстан куруп берүү ниетин билдирди. Энергетиктердин деңгээлинде сүйлөшүүлөр жүрүп жатат. Акыркы чечим президенттердин деңгээлинде кабыл алынат. Үлүш жана финансылык маселелер каралууда", — деди өкмөт башчы.
Камбар-Ата-1 ГЭСи тууралуу
Камбар-Ата-1 ГЭСи кубаттуулугу боюнча 1 860 мегаватты түзүп (Токтогул ГЭСинен бир жарым эсеге чоңдук кылмакчы), жылына 5,6 миллиард киловатт-саат электр кубатын иштеп чыгары кабарланган. Салыштыруу үчүн айтсак, былтыр өлкөдө 15 миллиард киловатт-саат өндүрүлгөн. Сөз болуп жаткан ГЭС Токтогулдан жогорураак, Нарын дарыясына салынмакчы. Плотинанын бийиктиги 256 метр болору айтылууда. Суу сактагычтын көлөмү 5,4 миллион куб метр болмокчу. Алдын ала эсептөөлөр боюнча, долбоорго жумшалган каражаттын суммасы 2,9 миллиард долларга чыгат деп болжолдонууда.
Объект өзүн-өзү 12 жылда актай тургандыгы айтылат. Тактап кете турган маанилүү учур мында CASA-1000 долбоору эске алынат. Электр төрт мамлекеттин — Кыргызстандын, Тажикстандын, Афганистандын жана Пакистандын аймагынан өтмөкчү. Долбоор Борбор Азия мамлекеттерине өндүрүштөн электр кубатын чыгарууга мүмкүнчүлүк берет.
Камбар-Ата-1 ГЭСин башында "Интер РАО" ишканасы кура турган болгон. Бул боюнча макулдашууга 2012-жылы кол коюлган. Анткен менен ал кездеги президент Алмазбек Атамбаев Россия долбоор боюнча милдетин аткара албастыгын айтып, эки макулдашууну жокко чыгарган. Экинчиси Жогорку-Нарын каскады боюнча эле.
Ал эми 2017-жылы Өзбекстан президенти Шавкат Мирзиёев алар Камбар-Ата ГЭСи боюнча долбоорго катышууга макул экендигин билдирген жайы бар. Бирок биринчи же экинчи станциянын кайсынысы экендигин так айткан эмес.
Былтыр президент Садыр Жапаровдун Өзбекстанга болгон иш сапарынын алкагында Камбар-Ата-1 ГЭСинин курулушуна инвестициялык долбоор тартуу тууралуу келишимге кол коюлган.