БИШКЕК, 25-янв. — Sputnik. Бишкекте жарык өчкөнүнө байланыштуу Бишкек — Исламабад багыты боюнча жүргүнчүлөрдү каттоо токтотулду. Бул тууралуу Sputnik Кыргызстан агенттигине "Манас" эл аралык аэропортунун маалымат катчысы Алия Курбанова билдирди.
Анын айтымында, Бишкектен Исламабадга барчуларды каттоо алдында электр жарыгы өчүрүлгөн. Башка багыттар боюнча азырынча учуулар жок.
Белгилей кетсек, бүгүн саат 11:00дөн кийин Кыргызстандын бир нече аймагында электр энергиясы өчүп калган. Көп өтпөй Өзбекстан менен Казакстанда дагы массалык түрдө жарык өчкөнү айтылды.