Бишкектин чок ортосун көрктөндүрүү планы жарыяланды. Эскиз

БИШКЕК, 24-янв. — Sputnik. "Бишкек башкы архитектура" мамлекеттик мекемеси борбор калаанын чок ортосун кооз жана шаар тургундары үчүн ыңгайлуу кылып жасалгалоо планын жарыялады.

Анда "Ала-Тоо" аянты көзгө жагымдуу жана кызыктуу болушу үчүн бак-дарактарды отургузуп жашылдандырып, автоунаа токтотуучу жайларды алып жаңы функцияларды жайгаштыруу ниети айтылат. Ошондой эле кышкысын коньки, жайында ролик, скейтборд тебүү жана башка оюндардын аянтчасын түзүү сунушталган.

Фонтандарды заманбап түрүнө алмаштырып, арчаларды отургузуп, келечекте жаңы жылда пластмасса конструкциялардын ордуна ошолорду кооздосо болору жазылган.

Унаа токтотуучу жайдын ордуна дарактарды отургузуп, теннис аллеясын негиздөө каралган. Ал эми автоунаалар үчүн жер астына токтотмо куруу пландалып жатат.

Аны менен жөө басууга ыңгайлуу шарттарды түзүү үчүн жолдордун планын өзгөртүү камтылган.

Мындан сырткары, "Бишкек башкы архитектура" жарнамалык щиттер менен баннерлер, афишалар алынышы керектигин белгиледи.

Аталган долбоор министрлер кабинетине көрсөтүлүп колдоо тапканы айтылды. Бирок масштабдуу иштер качан башталары жана канча каражат жумшалары белгисиз.

Мекеме андан кийинки кезекте Эмен паркын, эски аянтты жана Эркиндик проспектин жакшыртуу планы турганы кошумчалады.