БИШКЕК, 21-янв. — Sputnik. Кара-Балтада Жайыл районунун ички иштер бөлүмүнүн жетекчисинин орун басары Кайрат Иманалиевдин машинасын өрттөп кетишти. Бул тууралуу Чүй облустук ИИББ билдирди.
Түнкү саат 03:40та 33 жаштагы подполковник Иманалиев өрт өчүрүүчүлөр менен милицияга телефон чалып, көп кабаттуу үйдүн короосунда токтоп турган Honda Accord үлгүсүндөгү автоунаасы күйүп жатканын билдирген.
Жерине ыкчам тергөө тобу менен райондун өрткө каршы күрөшүү кызматы барган.
Милициянын маалыматына караганда, өрт өчүрүлүп, машинанын арткы отургучунан таш табылган. Алдын ала маалымат боюнча, салондун чехолунан күйүүчү майдын жыты чыгып турган.
Окуя боюнча тийиштүү соттук-техникалык жана соттук-химиялык экспертиза дайындалды. Факты каттоого алынып, тергөө уланууда.