Кыргызстанда азиз адамдар үчүн мектеп 1938-жылы ачылган. Учурда өлкөдө эки мектеп-интернат иштеп жатат. Бул тууралуу Жумабай Исмаилов Sputnik Кыргызстан радиосунда маек куруп жатып билдирди.
Анын айтымында, Кыргызстанда 4000ден ашык азиз адам жашайт.
"Мен бала кезимен эле көрбөй калгам. Эжем мектепке барса кошо окугум келчү. Анан ал пластилинден тамга жасап берип, аны кармап көрүп кагазга чиймелечүмүн. Анда да эмнени жазып, чийип жатканың белгисиз болот экен. Кийин Брайль шрифти менен окуп, жазганды үйрөнгөндө окууга, жазууга кызыгуу пайда болду. Негизи бала кезинен көзү көрбөгөн адамдар Брайль шрифтин үйрөнмөйүнчө билим алуусу мүмкүн эмес. Анткени сөздөр кандай жазыларын, үтүр, чекит деген эмне, сүйлөм кандай түзүлөрүн дал ушул кагазга түшүрүлгөн "быдыр" жазуу менен гана үйрөнүү мүмкүн. Ал эми кийин гана көзү көрбөй калгандардын грамматикасы жакшы болуп, маселе жаралбайт. Учурда көзү азиздер үчүн адистештирилген республикалык китепканада орус тилиндеги китептер басымдуулук кылат. Китепканага 2000-жылдардан кийин гана кыргыз тилиндеги жомок, тамсил, сөздүктөр келип түштү. Брайль шрифтиндеги китептерди басып чыгаруу кымбат турат. Каражаттын жетишсиздигине байланыштуу жаңы китеп басып чыгара элекпиз. Ошондуктан көпчүлүк учурда аудиокитептер колдонулуп жатат. Бүгүнкү күндө өлкөдөгү көзү азиздер үчүн эки мектеп-интернат орус тилинде окуткандыктан, Россиядан журнал, китептер алып келинет. Бул үчүн өкмөт тарабынан каражат бөлүнөт", — деди Исмаилов.
Ал дүйнө жүзүндө колдонулган Даксбери Брайль котормочу программасына кыргыз алфавити да киргизилгенин жана атайын адистештирилген Брайль принтери менен китептерди басып чыгарса болорун кошумчалады.