БИШКЕК, 18-янв. — Sputnik. Оштун Алай районунда изделип жаткан 71 жаштагы Бактыгүл Үсөнованын сөөгү табылды. Бул тууралуу ӨКМдин маалымат кызматы билдирди.
Ал 12-январь күнү болжол менен саат 14:00дөр чамасында үйүнөн чыгып кеткен бойдон кайрылып келген эмес. Издөө иштери жүргүзүлүп жатканын облустук милициядан кабарлашкан.
"Издөөгө төрт куткаруучу, ИИМдин 15 кызматкери жана туугандарынан үч адам тартылган. Бүгүн саат 11:10до дайынсыз жоголгон аялдын сөөгү суудан табылды", — деп айтылат билдирүүдө.
ӨКМден кошумчалашкандай, аялдын туугандары алгач аны өз алдынча издешкен. Анын кийимдери Гүлчө суусунун жээгинен табылган. Кийин ИИМ кызматкерлери издөө иштерине көмөк көрсөтүү үчүн ӨКМге жардам сурап кайрылган.