БИШКЕК, 15-янв. — Sputnik. Бишкектеги Дайыр Асанов атындагы Кыргыз улуттук аскер лицейинде окуган баткендик курсанттар Баткен шаарындагы мектеп окуучулары менен жолугушуу өткөрдү. Бул тууралуу президенттин аймактагы өкүлчүлүгү кабарлады.
Маалыматта белгилегендей, былтыр президент Садыр Жапаровдун колдоосу жана Баткен облусунун башчысы Абдикарим Алимбаевдин демилгеси менен Баткен облусунун чек ара аймагында жашаган 57 бала аталган лицейге окууга жөнөтүлгөн. Дайыр Асанов атындагы лицей жыл сайын 150 баланы окууга кабыл алат.
"Курсанттар эс алууга чыккандыгына байланыштуу Баткен шаарындагы мектептердин окуучулары менен жолугушуу өткөрүштү. Келечек ээлери окуучуларды мекенчилдикке жана патриоттуулукка чакырып, алардын кызыккан суроолоруна жооп беришти", — деп жазылган маалыматта.
Мындан сырткары, облус башчысынын аракети менен Баткен облусунун аймагынан 20 бала Кыргызстандын жана Россиянын жогорку аскер окуу жайларына өткөн.