БИШКЕК, 13-янв. — Sputnik. Чүй облусундагы Кемин районунун аймагынан белгисиз үлгүдөгү тапанча, жылмакай сайлуу мылтык, Ф-1 кол гранатасы жана 5,6 × 15,6 мм R үлгүсүндөгү ондогон ок-дары сакталган жер табылды. Бул тууралуу УКМК билдирди.
Алдын ала маалыматтар боюнча, курал-жарак, ок-дары жана жардыргыч заттар кылмышкерлер тарабынан өзгөчө оор кылмыштарды жасоо үчүн даярдалган.
"Азыркы учурда алынган буюмдардын кайдан келгендиги жана бул жашыруун жайды уюштурган адамдарды аныктоо боюнча иш-чаралар жүргүзүлүүдө", — деп айтылат маалыматта.
УКМК куралдарды, ок-дарыларды, жардыргыч заттарды жана жардыргыч түзүлүштөрдү мыйзамсыз алуу, берүү, сатуу, сактоо, ташуу же алып жүрүү кылмыш экенин эскертет. Ал эми мындай каражаттарды укук коргоо органдарына өз ыктыяры менен тапшыргандар жоопкерчиликтен бошотулат.