Жогорку Кеңештин структурасы каралып жатканда аны иштеп чыккан жумушчу топтун төрагасы Султанбай Айжигитов мамлекеттик жана расмий тилди аралаштырып баяндама жасаган.
Андан соң эл өкүлү Надира Нарматова мамлекеттик тилди сыйлоого чакырды.
"Баарыңыздарга сунуш катары айткым келет. Биздин мамлекеттик тил — кыргыз тили. Ошондуктан өзүбүздүн тилди өзүбүз Жогорку Кеңеште сыйлай билели. Арабызда бир дагы орус улутундагы адам жок, 90 депутаттын ичинде дагы. Чү дегенде эле мындай баштаганыбыз туура эмес. Андыктан өзүбүздү биринчи сыйлайлы, анан башкалардан талап кылалы", — деди Нарматова.
Ал эми Нурланбек Шакиев иш кагаздары биринчи кезекте мамлекеттик тилде так, даана жазылышы керектигин айтып, ЖКнын аппарат кызматкерлерине эскертүү берди. Буга Айжигитов баяндамасында комитеттердин аталышын орусча айтканы себеп болду.
"Негизи биз мамлекеттик тилди сыйлашыбыз керек. Өзүбүз өнүктүрүп, өстүрбөсөк башкалар өнүктүрбөйт", — деди Шакиев.
Аны менен катар эле Адахан Мадумаров эки тилди аралаштырбай бир тилде так сүйлөөгө чакырды.
"Чыкканда же таза кыргызча, же таза орусча сүйлөсөк. Аталасын чыгарбасак. Кыргызча билбейсиңби, анда Лев Толстойдун, Пушкиндин тилин сыйлап, таза орусча айт. Кыргызча сүйлөйсүңбү, анда аралаштырба", — деп кайрылды депутат.
Ушундай эле сын-пикирин Таалайбек Масабиров дагы билдирип, иш кагаздарды дагы эки тилде өз-өзүнчө жазууну талап кылды. Анын айтымында, парламенттин структурасы боюнча жазылган маалыматтын жарымы кыргыз, жарымы орус тилинде жазылып калган.
Тема боюнча: