БИШКЕК, 12-янв. - Sputnik. Казакстандын президенти Касым-Жомарт Токаев Алматыга келди. Бул тууралуу Sputnik Казакстан жазып, маалыматты Акордо тастыктаганын белгиледи.
Токаев түштүк борборго жабыркаган шаарды өз көзү менен көрүш үчүн келген. Ал ошондой эле курман болгон полиция кызматкерлери менен аскерлердин туугандары менен дагы жолуккан.
"Президенттин Алматыга барганын тастыктайбыз. Ал шаардагы ыкчам штабдын жыйынына катышты. Мындан тышкары, каза болгон полиция кызматкерлери менен жоокерлердин туугандарына көңүл айтып, сыйлык тапшырды", — деп маалымат катчы Берик Уали билдирген.
Буга чейин алматылыктар кортеж менен көп сандагы тик учактарды көргөнү айтылган.