Аталган бизнес-форум алгач февраль айына пландалган. Бирок катышууга Казакстан жана Өзбекстан өлкөлөрүнөн да өкүлдөр чакырылып жатканына байланыштуу, биринчиден, кошуна өлкөдөгү абалдын турукташуусун эсепке алып, экинчиден, аялдардын эл аралык майрамын утурлай өткөрөлү деп чечтик. Бул тууралуу Роман Касымов Sputnik Кыргызстан радиосунда маек куруп жатып билдирди.
Анын айтымында, форумга тигүүчүлүк бизнесин өнүктүрүүгө басым жасалып, ишкерликтин ушул түрү менен алектенген аялдар катышат.
"Мезгил өткөн сайын ишкерликте аялдар басымдуулук кыла баштады. Буга коомчулуктун да көз карашы өзгөрүп, бир эле бизде эмес, алсак, Россияда да ишкер аялдарга болгон түрдүү мамлекеттик колдоолор бар. Кыргызстанда аялдар көбүнесе тигүүчүлүк тармагында башка өлкөлөрдөн ири тапшырыктарды алып ушул багытта иштөө менен алектенишет. Муну биз былтыр октябрь айында Кыргызстандын аялдар конгресси жана Соода өнөр-жай палатасы менен биргеликте өткөргөн биринчи бизнес-форумда байкаганбыз. Мартта да ушул эле багытты тереңдетип, Казакстан, Өзбекстан мамлекеттеринен да тигүүчүлүк багытта бизнес жасаган аялдарды чакырып жатабыз. Коронакризис учурунда так ушул аялдар жүргүзгөн бизнес түрлөрү туруктуулугун көрсөтүп, бат калыбына келип жана айрымдары дээрлик чыгымга учурабай иштеп кете алышты. Мындан улам биз өлкөдө ишкерлик жүргүзүүдө аялдарды колдошубуз керек деген тыянакка келдик", — деди Касымов.
Ал соңку жылдары Кыргызстан менен Өзбекстандын ортосунда текстиль ишкерлиги боюнча тыгыз байланыштар түзүлүп келе жатканын кошумчалады.