БИШКЕК, 11-янв. — Sputnik. Бишкектин кайра шайлоо өтчү эки округуна талапкерлигин койгондордун саны 23кө жетти. Бул тууралуу маалымат БШКнын сайтына жарыяланган.
Билдирүүгө ылайык, №27 Биринчи май шайлоо округунан 9 жаран шайлоого катышуу ниетин билдирген. Ал эми №29 Свердлов шайлоо округунан 14 адам Жогорку Кеңештин депутаты болууга белсенди.
Бул округдардан талапкерлигин көрсөтүүнү каалаган жарандар 27-январга чейин арыз бере алат. Аларды каттоо мөөнөтү 6-февралда аяктайт. Андан кийин шайлоо алдындагы үгүт иштерине 20 күн берилет. Кайра шайлоо 27-февралга белгиленген.
Эске салсак, ушул жылдын 28-ноябрында өлкөдө Жогорку Кеңештин VII чакырылышына депутаттарды шайлоо болуп өткөн. Анда Свердлов жана Биринчи май шайлоо округунда "баарына каршы" графасы талапкерлердин алган добушунан ашып кеткендиктен шайлоо өтпөй калды деп таанылган.