БИШКЕК, 11-янв. — Sputnik. Жогорку Кеңештин депутаты Акбөкөн Таштанбеков соттун чечими менен УКМКнын тергөө абагынан чыгарылды. Бул тууралуу Бишкек шаардык сотунан маалымдашты.
Мындай чечимди 10-январь күнү Свердлов райондук соту кабыл алган. Ал эч жакка чыкпоо боюнча тил каттын негизинде бошотулду.
Таштанбеков парламенттик шайлоого № 30 Ысык-Ата шайлоо округунан депутаттыкка талапкер болуп катышкан. Шайлоо бүткөн соң ага улуттар аралык жана аймактар аралык кастыкты козутууга аракет кылган деген айып тагылып, кылмыш иши козголгон болчу. 6-декабрда Биринчи май райондук сотунун чечими менен талапкер кармалып, кийин УКМКнын тергөө абагына которулган.
31-декабрда камактагы Таштанбековго БШК депутаттын күбөлүгүн жана төш белгисин тапшырган. Ал азырынча Жогорку Кеңеште депутат катары ант бере элек.