Кыргыз аялдарынын улуттук баш кийими элечек ак кездемеден тегерете кат-кат болуп оролот. Жолдошум Нарындын тынымсейит уруусунан болгондуктан биздин элечек оң жакка жыгылып турат. Бугу элечек дагы бизде кийилет. Жаңы келген келиндердин элечегин шөкөттөп кызылдан, күмүштөн тагып койгон. Кайнене келинине чач учтук, шакек өңдүү жасалгаларды өткөрүп берген. Бул тууралуу Чынаркүл Сокеева Sputnik Кыргызстан радиосунда маек куруп жатып билдирди.
Анын айтымында, кыргызда аялдарды элечегине карап кайсы уруунун, кайсы жердин келини экенин билишчү.
"Биздин апалар уз болгон. Мен теңдүүлөр апаларыбызга жардам берип, шырдак жасап, сайма сайып өстүк. 2018-жылы Нооруз майрамында 13 элечектин түрү көрсөтүлүп, чоң иш-чарага катышып калдым. Ошондо улуттук кийимге болгон кызыгуум, изденүүм башталды. "Кийиз дүйнө" коомдук фонду уюштурган курска барып, белдемчимди тигип, сайма сайдым. Мунун баары ата-бабаларыбыз бизге калтырган таберик да. Азыр бардык кийимдеримди колго тигип алам. Элечек менен белдемчини кийгенде эле башкача толкунданып, кыргыздын улуттук кийимин кийгенден кийин өзүңдү да ошого ылайыктуу алып жүргөнгө аракет кыласың. Элечекти кооздук катары 1-2 иш-чара кийип койгон болбойт деп эсептейм. Эгерде аял дайыма кийүүгө даяр эмес болсо, жакшылыктарда кийип турса дурус болмок. Учурда көптөгөн апалар ар кандай тойлорго элечек ороно башташты", — деди Сокеева.
Ал сайма саюу, элечек ороо сыяктуу билимдерин кыздарына үйрөтүп, каалоочуларга байма-бай мастер-класс өткөрүп, келиндерге уруусуна жараша элечек ороп берип турарын кошумчалады.
Подкасттын толук вариантын төмөнкү видеодон көрүңүз: