Турак жай кооперативине мүчөлүккө өткөн адам көз жумган учурда анын кошкон каражаттары мураскерлерине төлөнүп бериши шарт. Бул тууралуу Орозбек Сыдыков Sputnik Кыргызстан радиосунда маек куруп жатып билдирди.
Анын айтымында, мыйзам турак жай кооперативдерин тигил же бул учурда мүчөлүккө өткөн адамга каражатын кайтарып берүүгө милдеттендирет, бирок ал кандай шартта ишке ашарын кооператив менен мүчөнүн ортосунда түзүлгөн келишимге байланыштуу.
"Жаран кооперативге мүчө болуп, документте көрсөтүлгөн эрежени бузбай төлөмдөрүн жүргүзүп турган учурда ортодогу келишимди бир тараптуу буза алат. Тагыраагы, мүчөлүктөн жеке каалоосу менен чыккан кезде буга чейин которгон каражаттарын кайтарып ала алат. Бирок анын мөөнөтү, шарты, канча пайызы кайтарылары кооператив менен түзгөн келишимине ылайык жүргүзүлөт. Мындан сырткары, жаран каза болуп калган учурда анын мүчөлүк күбөлүгүнүн негизинде акча мураскерлерине кайтарылып берилет. Ошондой эле кооператив өз милдеттерин аткарбай же кечиктирип жаткан учурда да мүчөлөрү кошкон каражаттарын кайра талап кылууга укуктуу. Мында деле анын мөөнөтү, пайызы ортодогу келишимге ылайык ишке ашат. Башкача айтканда, турак жай кооперативдерин мыйзам ар кандай учурларда мүчөлөрүнө акчасын кайтарып берүүгө милдеттендирет. Ал эми анын шарттарын мамлекет бекитпейт", — деди Сыдыков.
Ал ошондой эле турак жай кооперативинен акчаны кайтарып алууда банк аркылуу жүргүзүлгөн, мүчөлүк китепчесинде көрсөтүлгөн гана каражаттар тууралуу сөз болорун кошумчалады.