БИШКЕК, 3-янв. — Sputnik. Оор көнүгүүлөр тынчсыздануудан дары-дармек жана терапияга караганда майнаптуу арылта турганын Гетеборг университетинин окумуштуулары билдирген. Бул тууралуу "Популярная механика" басылмасы жазды.
Изилдөөчүлөр активдүү машыккан 286 адамдагы тынчсыздануунун интенсивдүү белгилери 12 жуманын ичинде кандай өзгөрөрүн байкоого алышкан. Изилдөөгө катышкандардын орточо курагы 39 жашты түзүп, сынактан өткөндөрдүн 70 пайызы аялдар болгон. Алардын жарымы болжол менен он жылдан ашык кабатырлануу синдрому менен жашап келишкен.
Катышуучуларды чүчү кулак тартуу менен орточо жана интенсивдүү топко бөлүшкөн. Эки топ тең жумасына үч жолу 60 мүнөттөн физиотерапевттин жетекчилиги астында машыгуудан өтүп турушкан. Андан кийин катышуучулар өз алдынча тынчсыздануу, тез-тез дем алуу, жүрөктүн бат-баттан согуусун жана титирөөсүн камтыган оорунун белгилери тууралуу билдирип турушкан.
Жыйынтыгында ашыкча кабатырлануу белгилери өнөкөт оорусу барларда да ылдыйлаган. 12 жумалык программадан кийин көпчүлүгүнүнүн тынчсыздануусу "орто жана жогорудан" төмөнкү деңгээлге түшкөн. Салыштырмалуу түрдө алганда төмөнкү интенсивдүүлүктө көнүгүү жасагандар симптомдорун 3,62 эсеге жакшырта алышкан. Бирок жакшы машыккандар андан да мыкты жыйынтыктарга жетишкени аныкталган.
Учурда тынчсыздануудан дарылануунун стандарттуу ыкмасы катары когнитивдик жүрүм-турум терапиясы эсептелет. Мында жумасына эки жолу терапевт менен сессия өткөрүп, психотроптук препараттарды алуу каралган. Бирок бул чөнтөгү жука адамдарга кол жеткис болушу мүмкүн. Ошондой эле окумуштуулар дары-дармектин кыйыр таасир берерин жана дайыма эле жардам бере бербей турганын белгилешет.