БИШКЕК, 30-дек. — Sputnik. Бүгүн Жогорку Кеңеш төрт вице-спикер тандап, жаңы комитеттерди курай алган жок.
ЖКнын түзүмүн аныктоо боюнча вариантты палатага атайын жумушчу топтун төрагасы Султанбай Айжигитов сунуштады.
Комиссия төраганын эки орун басары партиялардын, дагы экөө бир мандаттуу округдардын депутаттарынан болушу керек деп сунуштаган. Ал эми мурдараак жети комитет түзүү боюнча айтылган.
Алар:
1.
Эл аралык иштер, коргонуу жана коопсуздук боюнча комитет;2.
Отун-энергетикалык комплекси, жер казынасын пайдалануу, өнөр жай саясаты жана экология боюнча комитет;3.
Конституциялык мыйзамдар, мамлекеттик түзүлүш, сот-укуктук маселелер жана Жогорку Кеңештин регламенти боюнча комитет;4.
Финансылык жана экономикалык саясат боюнча комитет;5.
Социалдык саясат, билим берүү, илим, саламаттыкты сактоо жана спорт боюнча комитет;6.
Укук тартиби, кылмыштуулук менен күрөшүү жана коррупцияга каршы күрөшүү боюнча комитет;7.
Транспорт, коммуникациялар, архитектура, курулуш жана агрардык саясат боюнча комитет.Парламенттин маалымат кызматы талкууда депутат Адахан Мадумаров төраганын эки орун басарын калтырып, комитеттердин санын 12ге чейин көбөйтүү зарылдыгын белгилегенин билдирди. Депутаттын пикиринде, маданият чөйрөсүндөгү маселелерге жана өлкөнүн бюджетин түзүүгө өзгөчө көңүл буруу керек.
Депутат Мирлан Самыйкожо Агрардык саясат боюнча өзүнчө комитет түзүү керектигин, ал эми маданият маселелерин Социалдык саясат, билим берүү, илим, саламаттык сактоо жана спорт боюнча комитеттин карамагына киргизүү керектигин билдирген.
Депутат Надира Нарматова үй-бүлөлүк зордук-зомбулуктун көбөйүшүнө байланыштуу аялдардын жана балдардын укуктарын коргоо көйгөйлөрүнө өзгөчө көңүл буруу керектигин айткан.
Талкуунун жыйынтыгы боюнча, депутаттар комиссияга ЖКнын түзүмү боюнча айтылгандарды эске алып кайра карап чыгууну сунуштаган. Аталган маселени 12-январда кароого убада берип, алар жаңы жылдык каникулга кетишти.