БИШКЕК, 30-дек. — Sputnik. Коронавирус хоккей боюнча жаштардын дүйнө биринчилигине катышып жаткан оюнчуларга да жугуп, чемпионат токтотулду. Бул тууралуу "Газета" маалымат булагы жазды.
Мындай чечим шайба менен ойнолуучу хоккейдин Эл аралык федерациясы (IIHF) тарабынан кабыл алынган. Кечээ, шаршемби күнү, Швейцария курама командасы АКШ менен беттешмек эле, бирок америкалык оюнчулардын айрымдары коронавирус илдетине кабылгандыктан оюнга кире алган эмес. Ошондой эле Россия курама командасынын оюнчусу Матвей Мичковдун COVID илдетин жуктурганы тастыкталып, россиялыктар Словакия менен болгон тайпалык баскычтагы беттеште техникалык жеңилүүгө дуушар болушту.
IIHF президенти Люк Тардиф жаштардын дүйнө чемпионаты келерки жылдын жай айында болорун билдирди.
"Бул турнирди токтоттук, бирок январь айынан тарта жаңысын уюштуруу боюнча иштей баштайбыз. Жаштар арасында дүйнө чемпионатын өткөрүү каалообуз күч. Балким, оюн жайында, июнь айында болор. Токтотуу боюнча чечим чемпионатты өткөрүүдөн таптакыр баш тартуу дегенди билдирбейт. Ооба, беттештер кайра ойнолот. Учурда аны сөзсүз Канадада өткөрүү керек, укук ушул өлкөдө. Телевидение, ага сарпталган каражаттын баарын эске алганда мындай беттешти токтотуу оңой эмес. Биз аларга мүмкүнчүлүк беришибиз керек, жаштардын дүйнө чемпионаты Канадада өтөт", — деген ал.
Тардиф ошондой эле федерация бир айдын ичинде жаңы план иштеп чыгышы керектигин белгиледи.