БИШКЕК, 27-дек. — Sputnik. Адамдардын иммунитети канчалык бекемделген сайын пандемиянын соңу ошончолук жакындай баштайт. Бул тууралуу "Известия" басылмасы Гамалея атындагы борбордун вирусологу Александр Бутенконун айтымына таянып кабарлады.
"Өзүбүз көрүп жаткандай, COVID-19 мутация болуп кетүүгө абдан жөндөмдүү вирус экен. Бирок мутация дайым эле вирустун пайдасына иштей бербейт. Илимде мутация болгон сайын вирус алсызданган учурлар белгилүү. Андыктан COVID-19 деле ошол сценарий менен кетиши толук ыктымал", — деди Бутенко.
Адистин пикиринде, пандемиянын бүтүшүнө себеп боло турган экинчи жагдай — дүйнө жүзүндөгү адамдардын басымдуу бөлүгүнүн иммунитетинин бекемделиши. Мындай учурда вируска жашай турган жер калбай, мутация болуу мүмкүнчүлүгү дагы азаят. Андыктан вирусолог эмдөөдөн өтүү маанилүү экенин кошумчалады.