БИШКЕК, 25-дек. — Sputnik. 2020-жылдын 1-октябрынан бүгүнкү күнгө чейин өлкөдө 959 ипотекалык кредит берилди. Бул тууралуу мамлекет башчы Садыр Жапаров министрлер кабинетинин жыйналышына катышып жатып билдирди.
Президент келе жаткан жылы ипотекалык насыяга бюджеттен беш жарым миллиард сом бөлүп берилерин белгиледи.
"Ипотекалык насыялоо боюнча пайыздык чен бюджеттик чөйрөнүн кызматкерлери үчүн төрт пайызга чейин төмөндөтүлдү. Бул рынокто эң төмөнкү пайыздык чен болуп саналат. 2020-жылдын 1-октябрынан бүгүнкү күнгө чейин 959 ипотекалык кредит берилди", — деди ал.
Садыр Жапаров 2020-жылдын аягында кредиттер боюнча пайыздарды төлөө үчүн бюджеттен 734 миллион сом бөлүнгөнүн айтып, жыйынтыгында өткөн жылдын аягында 390 миңден ашык карыз алуучуга жардам берилгенин кошумчалады. Ал февраль айынан баштап дыйкан-фермерлерге насыя алты пайыз менен берилет деген маалыматты кошумчалады.
Белгилей кетсек, бүгүн өкмөттө президенттин төрагалыгы астында жыйналыш өттү. Анда министрлер кабинети 2021-жылы аткарган иши боюнча отчёт берди.