Салык кызматынын төрагасынын орун басары Бекболот Аалиевдин айтымында, ККМ колдонбогон жеке ишкерге 7 500 сом, юридикалык ири компанияларга 23 миң сомго чейин айып пул салынат. Эгер кассалык аппаратты алып, бирок иштетпей, керектөөчүлөргө чек бербесе 3000 сом айып салынат.
"Кассалык аппаратты жаңы алып иштетип жаткандарда, албетте, анча-мынча адашуу болот, баспай калат. Ошондуктан биз эки-үч ай бул жагына көзөмөл кылбайбыз. Азыр биз үчүн маанилүүсү — кассалык аппараттарды койдуруу", — деди Аалиев.
Ал эми Экономика жана коммерция министрлигинин Салык саясаты башкармалыгынын жетекчиси Кубанычбек Ысабеков лотерея ойнотуу жана кешбэк чогултуу аркылуу коомдук көзөмөл жүргүзүлөрүн айтты.
"Жарандар чек талап кылганга стимул болушу үчүн чогулткан чектеринен лотерея ойнотуп, уткандарга түрдүү белектерди берүү каралган. Экинчи этап кешбэк системасы — кассалык чекти сканерлеп жиберсе, көрсөтүлгөн сумманын кайсы бир пайызы өзүнүн эсебине которулат. Мындайча айтканда, салыкчылар гана рейд жүргүзүп кассалык аппараттын иштешин текшербестен, бүт жарандар көзөмөл кылат. Канча пайызы кешбэк болуп берилери Салык кодексинде каралган эмес. Азыркы тапта министрлер кабинети тарабынан токтом даярдалууда. Аз пайыз кылып койсо эл кызыкпай калат, көбөйтүп салса мамлекетке оор келет. Ошондуктан эки тарапка тең пайдалуу ыкмасын карап жатабыз", — деди Ысабеков.
Буга чейин салыкчылар ККМ колдонгон ишкерлер кандай салыктардан бошотулары туурасында айтып беришкен.