БИШКЕК, 22-дек. – Sputnik. Кыргызстанда энергетикалык компаниялардын саны эки эсеге, тагыраагы, 14төн жетиге кыскартылат. Бул тууралуу Улуттук энергохолдинг кабарлады.
Бириктириле турган компаниялар:
"Электр станциялары" ААК менен "Бишкек жылуулук тармагы" ААК;
"Кыргызстан улуттук электр тармагы" ААК менен "Түндүк электр", "Чыгыш электр", "Ош электр" жана "Жалал-Абад электр" ААКтары кошулат;
"Кыргызстан улуттук электр тармагы" ААК менен бөлүштүрүүчү компаниялардын биригүүсү эки этапта жүрө турганы айтылды.
"Алгач "Түндүк электр", "Чыгыш электр, "Ош электр" жана "Жалал-Абад электр" биригип, андан кийин аларга "Кыргызстан улуттук электр тармагы" кошулат", — деп жазылат маалыматта.
Ишкананын маалымат кызматы билдиргендей, энергосектордогу реформанын негизги максаты чыгымдарды оптималдаштыруу, аймактык электр тармактарын өнүктүрүү, энергетикалык компаниялардын ортосунда ресурстарды рационалдуу кайра бөлүштүрүү болуп саналат.