БИШКЕК, 20-дек. — Sputnik. Абсолюттук мушкерлер уюмунун (UFC) президенти Дана Уайт 2022-жылы көптөн күтүлүп жаткан беттешти атаганын "Чемпионат" сайты кабарлады.
"Ушул тапта мен Сирил Ган менен Фрэнсис Нганнунун беттешин чыдамсыздык менен күтүп жатам. Карьеранын туу чокусунда эки алптын беттешин көргүм келет. Бири буту менен жакшы иштесе, экинчисинин соккулары кыйратуучу күчкө ээ. Булардын тиреши кимдерди гана кызыктырбайт?" — деген Уайт журналисттерге.
Нганну ушул жылы мартта Стип Миочичти уткандан бери беттештерге чыга элек. Ал ортодо UFC утурумдук чемпиондук кур үчүн кармаш уюштуруп, Сириль Ган Деррик Льюсти уткан. Нганну Ганды татыктуу атаандаштардын бири деп атаган болчу.
Мушкерлердин кармашы кийинки жылы 22-январда UFC 270 турниринин алкагында болмокчу.