БИШКЕК, 20-дек. — Sputnik. Бишкек шаарынын Биринчи май райондук соту эки жыл мурда жарылуу болгон "Антошка" тез татым жайынын ижарачысына карата өкүм чыгарды.
Эске салсак, 2019-жылдын 8-ноябрында Чүй менен Эркиндик проспектилеринин кесилишиндеги тез татым жайында газ баллон жарылып, өрт чыккан. Анын кесепетинен ондон ашык киши жаракат алып, бир кыз каза болгон. Бишкек ШИИБдин тергөө кызматы териштирүү жүргүзүп, тез татым жайдын ижарачысы, 56 жаштагы К.А. кармалган.
Соттон билдиришкендей, К.А. КРдин Жазык кодексинин (эски редакция) 261-беренесине ("Өрт коопсуздугунун эрежелерин бузуу") боюнча күнөөлүү деп табылды. Ал 5-ноябрь күнү соттун өкүмү боюнча эки жыл алты айга эркинен жана коомдук тамактануу жайлаларында ишкерлик кылуу мүмкүнчүлүгүнөн ажыратылган.
Анткен менен КР Жазык кодексинин 83-беренесине (эски редакция) ылайык, ага бир жылдык пробациялык көзөмөл мөөнөтү берилди.
Ошондой эле сот эки жабырлануучуга 50 миң сомдон алып берди, ал эми көз жумган кыз боюнча тараптар элдешип алганына байланыштуу кылмыш иши токтотулду.
КР Жазык кодексинин 83-беренесинде эмне деп айтылган:
Эгерде соттолуучунун оңолуп-түзөлүшүнө тарбиялык таасир тийгизүүчү мажбурлоо чараларын колдонуу менен жетишүүгө мүмкүн деп табылса, кылмыштын деңгээлине жараша беш жылга чейинки убакытка соттолгон адамдарга карата пробациялык көзөмөл белгиленет. Мында соттолуучу эркиндикке чыгып, бирок жүрүм-турумуна карата өзгөчө талаптарды белгилөө дайындалалат.
Пробациялык көзөмөл оор жана өзгөчө оор кылмыш кылгандарга, чет элдик жана жарандыгы жок адамдарга каралган эмес. Ошондой эле жашы жете элек балдардын жыныстык кол тийбестигине доо келтирген кишилер пробациялык жеңилдик ала албайт.