БИШКЕК, 19-дек. — Sputnik. УКМКнын Чек ара кызматынын куралдануусуна "Байрактар" учкучсуз учуучу аппараттар келип түштү. Бул тууралуу мамлекет башчынын маалымат кызматы билдирди.
Президент Садыр Жапаров бүгүн Чек ара кызматынын куралдануусуна берилген "Байрактар" учкучсуз учуучу аппараттарын көрүп чыккан.
"Мамлекет башчыга бул аппараттарды башкаруу системасы тууралуу айтып, алардын ишин көрсөттү. Аталган аппараттар толугу менен республикалык бюджеттин каражатына сатып алынды жана өлкөнүн коргонуу коопсуздугун камсыз кылуу, анын ичинде мамлекеттик чек араларды кайтаруу үчүн колдонулат", — деп айтылат маалыматта.
Белгилей кетсек, буга чейин УКМК төрагасы Камчыбек Ташиев мамлекет Түркиядан "Байрактар", Россиядан "Орлан-10" учкучсуз учуучу аппараттарын сатып алып жатканын билдирген.