БИШКЕК, 14-дек. — Sputnik. Бишкек шаарында дээрлик 28 миң жеткинчек бала бакчага баруу үчүн кезекте турат. Бул туурасында баш калаанын вице-мэри Виктория Мозгачева Sputnik Кыргызстан агенттигинин мультимедиалык маалымат борборунда уюштурулган "Бишкек шаарынын социалдык тармактарын 2026-жылга чейин өнүктүрүү" аталышындагы брифингде сүйлөп жатып айтты.
Анын белгилешинче, бүгүнкү күндө борбор калаада 90 бакча бар. Анын үчөө башка органдардан кайтарылган. Быйыл алар оңдолуп, пайдаланууга берилди.
"Бул багыттагы иштер улантылат. Борбор калаадагы эки бала бакча капиталдык оңдоого муктаж, аны мэрия камсыздап жатат. Учурда Бишкекте бакчага 23 миңдей бала барса, дээрлик 28 миң бала кезекте турат. Алардын баарын камтуу боюнча бир катар көйгөйлөр бар", — деди Мозгачева.
Вице-мэр белгилегендей, Билим берүү жана илим министрлигинин "Наристе" программасы бала бакчадан мектепке чейинки билим ала албаган балдар үчүн уюштурулган. Анын айтымында, бул программада балдар биринчи класска өтүү үчүн керектүү көндүмдөрдү ала алышат.