Кыргызстандык мушкер Валентина Шевченконун келишкис атаандашы — UFC уюмунун жеңил салмактагы (61 кг) чемпиону Аманда Нуньес венесуэлалык Жулианна Пеньяга утулуп калып, курунан кол жууду.
Белгилей кетсек, Пеньяны Шевченко 2017-жылы колун кайруу ыкмасы менен уткан.
Венесуэлалык мушкер Нуньести кармаштын экинчи раундунда муунтуу ыкмасы менен жеңди. UFC 269 турнири Лас-Вегаста өткөн.
Жулианна Пенья UFC уюмунун чемпиондук наамына алгачкы ирет жетти. ММА боюнча 11 кармашты утуп, төрт ирет жеңилген. Былтыр декреттик өргүүсү бүткөндөн кийин карьерасын уланткан.
Кыргызстандык мушкер Шевченко буга чейин Нуньес менен эки ирет беттешке чыгып, экөөндө тең упай айырмачылыгы менен жеңилип калган. Андан кийин Валентина 61 килограмм салмактан 57 килограмм салмакка өтүп, 2018-жылы эң жеңил салмакта чемпион болгон. Бирок кыргызстандык спортчу экинчи кармашта өзүн жеңүүчү деп эсептейт. Ошондой эле Шевченко жакында эле бразилиялык мушкер кайрадан беттешүүдөн качып жатканын билдирген.
Аманда Нуньес 2014-жылдан бери биринчи жолу жеңилүү ызасын тартты. Ал утулбас жана эң күчтүү мушкерлердин катарын толуктап, UFC тарыхында биринчи жолу эки категорияда 61 жана 65 килограмм салмактагылар арасында чемпиондук титул алган.