БИШКЕК, 11-дек. — Sputnik. Кыргызстанда биринчи жолу эт-май багытындагы "Арашан" породасындагы койлорго электрондук бирка "чип" тагылды. Бул тууралуу Айыл чарба министрлигинин маалымат кызматы кабарлады.
Билдирмеге караганда, малга асыл тукум карталары толтурулуп, алар тууралуу маалымат башка сайтка жайгаштырылат.
"Чип" — анча чоң эмес электрондук каражат. Анын жардамы менен койлорду аралыктан каттоого болот. Чип тагардын алдында койлор толук көзөмөлдөн өткөрүлөт, андан соң идентификациялык номер берилет", — деп айтылат маалыматта.
Учурда мындай породадан өлкөдө 5 800дөй кой бар. Алардын козуларынын болжолдуу баасы 500 доллар, ал эми койлору 5 000 доллардан жогору.